गण्डकी खबर । पोखरामा बुधबार थप दुई कोरोना संक्रमित पुरुषको उपचारका क्रममा मृत्यु भएको छ ।
पोखराको फिष्टेल अस्पतालमा उपचाररत कोरोना संक्रमित पोखरा-१ का ७६ वर्षीय पुरुषको मंगलबार राति १०.२० बजे मृत्यु भएको हो । गण्डकी प्रदेश स्वास्थ्य निर्देशक डा. बिनोदबिन्दु शर्माका अनुसार मंसिर २५ गते कोरोना संक्रमण पुष्टि भई पोखराको फिष्टेल अस्पतालमा उपचारकै क्रममा उहाँको मृत्यु भएको हो । उहाँमा प्रेसर, सुगर लगायतका दीर्घरोगहरु रहेको बताइएको छ ।
त्यस्तै पोखरा-१२ निवासी ८४ वर्षीय कोरोना संक्रमित पुरुषको पोखराको फिष्टेल अस्पतालमा उपचारका क्रममा बुधबार बिहान ५.४५ बजे मृत्यु भएको छ । मंसिर २३ गते कोरोना संक्रमण पुष्टि भई उपचाररत उहाँको उपचारकै क्रममा मृत्यु भएको स्वास्थ्य निर्देशक डा. शर्माले बताउनुभयो । उहाँमा निमोनिया समेत रहेको बताइएको छ । यस संगै गण्डकी प्रदेशमा कोरोना संक्रमणबाट मृत्यु हुनेको संख्या एक सय ८६ पुगेको छ ।