गण्डकी खबर । कोदालो प्रहार गरी एक व्यक्तिको हत्या गरेको अभियोगमा स्याङ्जाको हरिनास गाउपालिकाका ५, आईडाँडाका ३६ वर्षीय रेशम रानालाई प्रहरीले पक्राउ गरेको छ ।
कोदालो प्रहारका कारण शनिबार सोही स्थानका १४ वर्षीय शेरबहादुर थापाको घटनास्थलमा नै मृत्यु भएको थियो । गण्डकी प्रदेश प्रहरी कार्यालयका प्रहरी नायव उपरिक्षक राजकुमार थिङले दिएको जानकारी अनुसार घटना पश्चात खटिइ गएको प्रहरी टोलीले कोदालो प्रहार गर्ने रानालाई नियन्त्रणमा लिएको र घटनाको थप अनुसन्धान गरिरहेको छ ।
त्यसैगरी तनहुँको डुम्रे बसपार्कबाट लागुऔषध सहित एक युवक पक्राउ परेका छन् । पक्राउ पर्नेमा भानु नगरपालिका ६ मुलपानीका २२ वर्षीय उमेश खड्का रहेको प्रहरीले जानकारी दिएको छ । शनिबार प्रहरीले चेकजाँच गर्ने क्रममा खड्काको साथबाट डाईजेपाम, नुरफिर र फेनारगन २० ⁄ २० एम्पुल गरी ६० एम्पुल फेला पारेको हो । प्रहरीले लागुऔषध सहित नियन्त्रणमा लिइ उनका बारेमा थप अनुसन्धान गरिरहेको बताएको छ ।
लागुऔषध गाँजा मुद्दामा धादिङ जिल्ला अदालतबाट फैसला भइ फरार पोखरा १ बगर बस्ने २५ वर्षीय विराज रजकलाई उनकै घरबाट प्रहरीले शनिबार पक्राउ गरेको छ । १ वर्ष ६ महिना कैद र १५ हजार रुपैया जरिवाना तोकिएका फरार प्रतिवादी रकजलाई नियन्त्रणमा लिइ थप अनुसन्धान गरिरहेको प्रहरीको भनाइ छ ।
