गण्डकी खबर । नेपाली कांग्रेसका राष्ट्रिय सभा सदस्य तारादेवी भट्टले विकास निर्माणको लागि अर्बौ रकम अपुग भइरहेको अवस्थामा अर्बौ रकम खर्च गरी निर्वाचन गर्नु बेठिक भएको बताउनुभएको छ ।
राष्ट्रिय सभाको शुक्रबारको बैठकमा बोल्दै भट्टले देशमा विकास निर्माणका लागि रकम अपुग भएको अवस्थामा निर्वाचनमा अर्बौ रकम खर्च गर्न खोज्नु कुनैपनि हिसाबले ठिक नभएको बताउनु भएको हो । जनताको सर्वोच्च निकाय प्रतिनिधि सभालाई वर्तमान समयमै विघटन गरिनु कुनैपनि ढंगले ठिक नभएको पनि उहाँले बताउनुभयो । जनताको म्याण्डेड अनुसार मुलुकमा स्थिर सरकार, सुशासन, समृद्धि र दिगो विकासको अपेक्षा गरिएको भएपनि प्रतिनिधि सभाको विघटनले बिडम्बनापूर्ण अवस्था सिर्जना भएको उहाँको भनाई छ । उहाँले दिगो विकासको लक्ष्य प्राप्तिको निम्ति सरकारले जनाएको अन्र्तराष्ट्रिय प्रतिबद्धता अनुसार काम नभएकोे बताउनुभयो ।
उहाँले भन्नुभयो ‘आज हामी अत्यन्त संवेदनशिल अवस्थामा छौँ । कोरोनाको महामारीसँग जुधिरहेका छौँ । थप महामारी आउनसक्ने संकेत दिइरहेका छन् । सिंगो मुलुक दत्तचित्त र एक भएर सामना गर्नुपर्ने बेला सरकार ढलाउने, संसद विघटन गर्ने, कुर्सिको हानाथापमा न त सरकार नै संवेदनशिल छ न अन्य देखिएका छन् । जुन, मुलुकको लागि दुर्भाग्यपूर्ण भएको छ । नेपाली जनतालाई केन्द्रविन्दु बनाएर अघि बढ्नुपर्ने बेला जनताको सर्वोच्च निकाय प्रतिनिधि सभालाई वर्तमान समयमै विघटन गरिनु कुनैपनि ढंगले ठिक छैन । यसको म घोर विरोध गर्दछु ।’
जनताबाट फ्रेस म्याण्डेड लिएको ३ वर्ष नपुग्दै पुनः जनताको म्याण्डेड लिन निर्वाचन गर्नुपर्ने आवश्यकता नभएको औँल्याउनुभयो । विभिन्न वैकल्पिक अवस्थाहरु हुँदाहुँदै चुनावमा जानुपर्ने आवश्यकता नरहेको उहाँको भनाई छ । जनताले सरकारको असक्षमता तथा क्रियाकलाप हेरिरहेको भन्दै उहाँले अहिले रोगहरुको व्यवस्थापन र विकासको मुद्धाहरुमा बहस गनुपर्ने बेला भएको बताउनुभयो । उहाँले भन्नुभयो ‘सरकारको के ध्यानाकर्षण गराउन चाहान्छु भने हामीले झण्डै २०० वर्ष पुरानो व्यवस्था खारेज गरेर २०४७ सालको उत्कृष्ट संविधानलाई पनि मान्दैनौ भनेपछि यो नयाँ संघीयताको खाका कोरेका होइनौँ र ? यतिवर्ष पुरानो व्यवस्थालाई खारेज गरिसकेपछि जनताबाट फ्रेस म्याण्डेड लिएर नयाँ नेपालको खाका कोर्न र देशको आर्थिक वृद्धि गर्न सुशासन र दिगो विकास गरी देशलाई समृद्धि तर्फ अघि बढाउने भनि पुराना विकृतिहरु हटाइ नयाँ र अग्रगामी विकास दिने भनेका होइनौ र ? जनताबाट फ्रेस म्याण्डेड लिएको ३ वर्ष नपुग्दै अर्को फ्रेस म्याण्डेड लिनुपर्ने किन आवश्यकता पर्यो ? जनताले झण्डै दुईतिहाई दिएर देशको विकास र समृद्धि तर्फ जाउ भनेको फ्रेस म्याण्डेड होईन र ? अहिले नै विभिन्न वैकल्पिक अवस्थाहरु हुँदाहुँदै किन चुनावमा जानुपर्ने ? सरकारको पारा, असक्षमता र क्रियाकलापहरु जनताले प्रत्यक्ष रुपमा हेरिरहेका छन्।’
उहाँले समितिको प्रतिवेदनहरु पास गर्नुपर्ने बेलामा प्रतिनिधि सभा भंग हुनुले आफुहरुको भूमिका हनन भएको महशुस गरेको पनि बताउनुभयो । सरकारको क्रियाकलापले व्यवस्था नै धरापमा पर्ने होकि भन्ने चिन्ता जाहेर गर्नुभयो । प्रतिनिधि सभा विघटन जनताको मर्म विपरित भएकाले सर्वोच्च अदालतले संविधान र जनताको सर्वोच्चतालाई ध्यानमा राखेर फैसला गर्ने विश्वास समेत व्यक्त गर्नुभयो ।
उहाँले बाढी पीडित, पहिरो पीडित लगायतको हालसम्म व्यवस्थापन हुन नसकेको, गरिबहरु भोकभोकै मरिरहेको भन्दै प्रधानमन्त्रीको भोकले कोही मर्ने छैन भन्ने उक्ति कहाँ पुग्यो ? भन्दै प्रश्न गर्नुभयो । सरकारको कोभिड व्यवस्थापन अस्पताल भद्रगोल भएको पनि बताउनुभयो ।पोखरा न्यूज