गण्डकी खबर ।पोखरामा कोरोना संक्रमणका कारण एक ३५ वर्षीय महिलाको निधन भएको छ । पोखरा महानगरपालिकाको वडा नं २९ की ३५ वर्षीय महिलाको बुधबार बिहान ६ बजे निधन भएको हो । उहाँको पोखरा स्वास्थ्य विज्ञान प्रतिष्ठान पोखरामा उपचारका क्रममा निधन भएको हो ।
पुष २९ गते उहाँमा कोरोना संक्रमण पुष्टि भएको थियो । उहाँमा कोभिड निमोनिया र हेपाटाइटिसको समस्या रहेको पनि गण्डकी प्रदेश स्वास्थ्य निर्देशनालयले जानकारी दिएको छ ।
त्यसैगरी पोखरामा बुधबार बिहान अर्काे एक जना महिलाको पनि कोरोना संक्रमणका कारण निधन भएको छ । स्याङ्जाको बिरुवा गाँउपालिका वडा नं ५ की ७० वर्षीय महिलाको बिहान ७ बजे निधन भएको हो । उहाँको पनि प्रतिष्ठानमा उपचार भइरहेको थियो । उहाँलाई मंगलबार कोरोना संक्रमणको पुष्टि भएको थियो । उहाँमा कोभिड निमोनियाको समस्या थियो ।
बुधबारसम्म प्रदेशमा कोरोना संक्रमणका कारण निधन हुनेको संख्या २०२ पुगेको छ ।
नवलपुरका एक पुरुषको कोरोना संक्रमणका कारण मंगलबार निधन भएको थियो । गैंडाकोट नगरपालिका वडा नं १३ का ५५ वर्षीय पुरुषको भरतपुर अस्पताल चितवनमा मंगलबार साँझ निधन भएको हो ।
गण्डकी प्रदेश स्वास्थ्य निर्देशनालयका अनुसार मंगलबार साँझ ६ बजे उपचारको क्रममा उहाँको निधन भएको हो । पुष २६ गते उहाँमा कोरोना संक्रमण पुष्टि भएको थियो । उहाँमा कोभिड निमोनिया र क्रोनिक मृगौला सम्बन्धी समस्या रहेको थियो ।
