गण्डकी खबर । कृषि तथा पशपन्छी विकास मन्त्री पद्माकुमारी अर्यालले पशु स्वास्थ्यसम्वन्धी जागरणमुखी अभियान सञ्चालन गर्न नेपाल पशुचिकित्सा परिषद्लाई सुझाव दिनुभएको छ ।
नेपाल पशुचिकित्सा परिषद्को नवनिर्वाचित नेतृत्वलाई बधाई दिन आज आयोजित कार्यक्रममा उहाँले शुभकामना तथा बधाई व्यक्त गर्दै पशु स्वास्थ्यसम्बन्धी जागरणमुखी अभियान सञ्चालनका बारेमा कार्यक्रम बनाउन निर्देशन दिनुभएको हो ।
पशु स्वास्थ्य प्रत्यक्ष मानव स्वास्थ्यसँग जोडिएको विषय भएपनि नेपाली समाजमा पशु स्वास्थ्यलाई त्यति महत्व नदिने प्रवृत्ति रहेको प्रसङ््ग जोड्दै उहाँले पशु स्वास्थ्यको विषयलाई अभियानकै रुपमा अगाडि बढाउनुपर्ने आवश्यकता रहेको औँल्याउनुभयो ।
“मानव स्वास्थ्य पशुस्वास्थ्यसँग प्रत्यक्ष जोडिएको विषय हो तर पशु स्वास्थ्यका सन्दर्भमा त्यति सचेत नहुने प्रवृत्ति हामी कहाँ हिजोदेखि नै रहिआएको छ”, उहाँले भन्नुभयो, “अहिले विस्तारै पशु स्वास्थ्यप्रति सचेत हुने वातावरण बन्दैछ तर गाउँमा अझैपनि त्यो वातारण बन्न बाँकी छ ।”
परिषद्का रजिष्टार नारायण घिमिरे, नवनिर्वाचित उपाध्यक्ष डा सुबिर सिंहले पशु चिकित्सासँग सम्बन्धित शिक्षण संस्थालाई गुणस्तरिय बनाउनका निम्ति लागेको जानकारी दिनुभयो ।
यही माघ ३ गते भएको परिषद्को निर्वाचनबाट उपाध्यक्षमा डा स्वयम प्रकाश श्रेष्ठ र डा सुबिर सिंह, सदस्यमा डा नरेशप्रसाद जोशी, डा सुजन राना, डा श्रृजना मानन्धर, डा मनोजकुमार शाही, डा सुवास श्रेष्ठ निर्वाचित हुनुभएको थियो । परिषद्को निर्वाचन चार÷चार वर्षमा हुने गर्दछ ।