गण्डकी खबर । गण्डकी प्रदेशका शिक्षा, संस्कृति, विज्ञान प्रविधि तथा सामाजिक विकास मन्त्री कुमार खड्काले प्रदेशलाई सडक मानवमुक्त बनाउने र कोरोनाका कारण अभिभावक गुमाएका
बालबालिकालाई नगद राहत उपलब्ध गराउने निर्णय गर्नुभएको छ ।
मन्त्रालयमा पदभार ग्रहणका क्रममा उहाँले सडकमा कोही पनि नागरिकले बास बस्नुपर्ने अवस्था नरहोस्
भन्दै उहाँले गण्डकीलाई सडक मानवमुक्त बनाउने निर्णय गर्नुभएको हो । संविधानले सबै नागरिकको
बाँच्न पाउने अधिकार दिएको बताउँदै उहाँले संविधान प्रदत्त अधिकार सरकारले उपलब्ध गराउनुपर्ने बताउनुभयो ।
मानव सेवा आश्रम जस्ता संस्थासँग सहकार्य गरेर सडकमा भएका नागरिकलाई आश्रममा राख्ने र त्यसको
दायित्व प्रदेश सरकारले व्यहोर्ने निर्णय गरिएको मन्त्री खड्काले बताउनुभयो ।
सरकारले आर्थिक वर्ष २०७८/०७९ को नीति तथा कार्यक्रम र बजेटमा कोरोना भाइरसका कारण
बाबुआमा गुमाएका बालबालिकालाई पाँच हजार रुपैयाँका दरले मासिक राहत उपलब्ध गराउने घोषणा गर्दै कार्यान्वयनको चरणमा अघि बढाइएको छ ।
लगत निकालेर यथासक्य चाँडो उनीहरूको खातामा पैसा पठाउने निर्णय गरिएको र पहिला आँकडा
निकालिने उहाँले बताउनुभयो । कार्यविधि तयार गरी संविधानले तोकेको समूहलाई बालबालिका मानेर रकम प्रदान गरिने उहाँको भनाइ छ । रासस
