पोखरा, ०३ फागुन । एकीकृत समाजवादीका अध्यक्ष माधवकुमार नेपालले राष्ट्रपति एमालेबाट बनाएको अवस्थामा बर्बाद हुने बताएका छन् ।
समाजवादी प्रेस संगठन कास्कीले आज पोखरामा आयोजना गरेको पत्रकार भेटघाट कार्यक्रममा बोल्दै अध्यक्ष नेपालले शक्ति सन्तुलनका हिसाबले पनि एमालेलाई राष्ट्रपति दिन नहुने बताए ।
सभामुख र राष्ट्रिय सभाका अध्यक्ष नेकपा एमालेबाटै भएको अवस्थामा राष्ट्रपति समेत एमालेलाई नै दिँदा शक्ति सन्तुलन गुम्ने र देशमा अस्थिरता पैदा हुने तर्क नेपालको छ । देशमा राजनीतिक स्थायित्व कायम गर्न तथा संविधानको रक्षा गर्नका लागि राष्ट्रपतिमा सहमति हुनुपर्ने जिकिर गर्दै अध्यक्ष नेपालले त्यस्तो राष्ट्रपति राजनीतिक वा गैरराजनीतिक दुवै हुन सक्ने बताए ।
पूर्व प्रधानमन्त्रीसमेत रहेका अध्यक्ष नेपालले राष्ट्रपति सहमतिबाटै हुनुपर्नेमा जोड दिँदै भने – ‘कतिपय संवैधानिक अड्चनका कुरा गर्छन् । कतिपय कानुनी अड्चनका कुरा गर्छन् । कतिपय व्यवहारिक अड्चनका कुरा गर्छन् । पात्रकै नाम लिइकन कतिपय कुराकानी चलेको होला । तर, सहमतिको पात्रको ठाउँमा अहिलेसम्म पुग्न सकेको छैन ।’
अहिलेको गठबन्धनलाई खिचडी गठबन्धनको संज्ञा दिँदै अध्यक्ष नेपालले विचार नमिल्नेहरुको गठबन्धन भएको बताए । ‘यो गठबन्धन संविधानप्रति पनि प्रतिबद्ध छैन । गणतन्त्र प्रति पनि प्रतिबद्ध छैन । संघीयताप्रति पनि प्रतिबद्ध छैन । र, परिवर्तनप्रति पनि गौरवबोध गर्दैन ।’ – अध्यक्ष नेपालले भने ।
वर्तमान सत्ता गठबन्धनकै कारण देश प्रतिगमनको यात्रातर्फ लागेको संकेत देखापर्न थालेको उनको जिकिर छ ।
