गण्डकी प्रदेश सरकारका सांसद एवम् पूर्व कानून,संचार तथा प्रदेश सभा मामिला मन्त्री विन्दु कुमार थापाले सार्वजनिक बिदालाई न्युनीकरण गर्न सरकारलाई ध्यानाकर्षण गराएका छन् ।
बुधबार सदनमार्फत उनले ध्यानाकर्षण गराएका हुन् । प्रदेश सभाको शुन्य समयमा बोल्दै थापाले नेपालमा सरकार परिवर्तन सँगै सार्वजनिक बिदा दिने होडबाजी नै चलिरहेको उल्लेख गरे । ‘नेपालमा सरकार परिवर्तन सँगै सार्वजनिक बिदा थप्ने होडबाजी नै चलेको छ । जसको न्युनीकरण हुनुपर्ने आवश्यकता छ । कुनै दिन विशेष दिवसमा सार्वजनिक विदा दिएर मात्र कसैको सम्मान तथा मर्यादा हुन्छ भन्ने भाष्य हामीले निर्माण गर्दै गयौं भने हामी कहाँ पुग्छौँ?’,उनले भने ।
फागुन महिनामा मात्रै १० दिन सार्वजनिक विदा हुँदा सर्वसाधारणहरु मारमा परेको अभिव्यक्ति उनको छ । अनावश्यक रुपमा थपिएको सार्वजनिक बिदाले विनास मात्रै गर्ने विकास नगर्ने हुँदा घटाउनुपर्ने उनले बताए ।
‘सार्वजनिक बिदा एक किसिमको अघोषित नेपाल बन्द जस्तै हो । अनावश्यक रुपमा थपिएको सार्वजनिक बिदाले विकास होइन विनास गर्छ । बिदालाई न्युनिकरण गर्न सभामुख र प्रदेश सरकार मार्फत संघीय सरकारलाई ध्यानार्कषण गराउँछु ।’,उनले भने ।
