पोखरामा आजदेखि सृजना कप भलिबल शुरु हुँदैछ । पोखरा रंगशालाको भलिबल कोर्टमा ४ दिनसम्म चल्ने प्रतियोगितामा ४५ टिमले भाग लिने भएका छन् । गण्डकी प्रदेशका मुख्यमन्त्री खगराज अधिकारीले आज दिउँसो साढे १ बजे प्रतियोगिता उद्घाटन गर्ने छन् ।
सृजना विकास केन्द्र र कास्की जिल्ला भलिबल संघको संयुक्त आयोजनामा संचालन हुन लागेको कास्की जिल्ला सामुदायिक विद्यालय छात्रछात्रा भलिबलमा विगतको तुलनामा टिम सहभागिता बढेपछि आयोजक समेत उत्साहित बनेको छ । २०७३ सालदेखि संचालित प्रतियोगिता कोरोनाक कारण बीचमा रोकिएको थियो । यसपालि पाँचौं संस्करणसम्म आइपुग्दा छात्रतर्फ ३० र छात्रातर्फ १५ टिमले सहभागिता जनाएको सृजना विकास केन्द्रका पूर्व अध्यक्ष एवं प्रतियोगिता संयोजक मीनप्रसाद भट्टराईले जानकारी दिए ।
छात्रछात्रा दुवैतर्फ विजेतालाई १-१ लाख, उपविजेतालाई ६०-६० हजार र तृतीय हुने विद्यालयलाई ३५-३५ हजारसहित शिल्ड, मेडल र प्रमाणपत्र प्रदान गरिने छ । सर्वोत्कृष्ट छात्रछात्रा दुवैलाई जनही ५ हजार र अन्य ६ विधाका उत्कृष्ट खेलाडीलाई पुरस्कृत गरिनेछ । उत्कृष्ट प्रशिक्षकले ५ हजार पाउने सिर्जना विकास केन्द्रका निवर्तमान अध्यक्ष एवं प्रतियोगिता संयोजक इन्द्रप्रसाद पौडेलले बताए । प्रतियोगिताको दिउँसो उद्घाटन हुने भए पनि बिहान ९ बजेदेखि नै खेल सुरु छन् भने फाइनल खेल फागुन १९ गते हुनेछ ।
प्रतियोगितामा कास्कीका सामुदायिक विद्यालयका कक्षा १२ सम्मका विद्यार्थीले भाग लिने छन् । गत वर्ष पोखरा–१८, भकुण्डेस्थित शान्ता माविले दोहोरो उपाधि जितेको थियो । प्रतियोगितामा १२ लाख ५० हजार आम्दानी हुने र ११ लाख खर्च लाग्ने आयोजकको अनुमान छ । बचत भलिबल खेलको विकासको निम्ति कोष स्थापना गरिने तथा सृजना विकास केन्द्रद्वारा संचालित सृजना बालगृहमा सहयोग गरिने सिर्जना विकास केन्द्रका कृष्णबहादुर थापाले जनाए ।
२०४३ सालमा डम्बरबहादुर केसी नेतृत्वको तत्कालीन सिर्जना युवा क्लबले रनिङ शिल्ड प्रतियोगिता आयोजना गरेको थियो । सृजना विकास केन्द्रको नाउँमा रुपान्तरित संस्थाले महिला, बालबालिका, शिक्षा, स्वास्थ्य, वातावरण लगायत क्षेत्रमा पनि क्रियाशील रहेको संस्था अध्यक्ष कृष्णबहादुर थापाले बताए । विगतदेखिको विरासत जोगाउँदै सृजनाले अहिले सामुदायिक विद्यालयस्तरमा छात्रछात्रा भलिबललाई निरन्तरता दिएको उनले बताए ।
पोखरा ८, सिमलचौरमा प्रधानकार्यालय रहेको सृजनाकै पहलमा जनप्रिय क्याम्पस, सिर्जना बहिरा विद्यालय, सृजना बालगृह, सृजना लघुबित्त (हाल जाल्पा लघुवित्त) खुलेका हुन् ।
