पर्वतको ठुलीपोखरीमा बृहत स्वास्थ्य शिविर हुँदै, औषधि र उपचार निशुल्क

पर्वतको कुश्मा नगरपालिका वडा नं. १२ ठुलीपोखरीमा आज फागुन २१ गतेदेखि बृहत विशेषज्ञ स्वास्थ्य शिविर हुने भएको छ ।

निजामती सेवा दिवसको अवसर पारेर निजामती कर्मचारी अस्पताल काठमाडौँको आयोजना तथा कुश्मा नगरपालिकाको सहआयोजनामा ठुलीपोखरी प्राथमिक स्वास्थ्य केन्द्रमा संचालन हुने शिविरको सबै तयारी पुरा भएको वडा नं. १२ का वडा अध्यक्ष झलक रिमालले जानकारी दिनुभयो । शिविर सञ्चालनका लागि स्वास्थ्य तथा जनसंख्या मन्त्रयालयसँग समन्वय र स्वास्थ्य तथा जनसंख्या मन्त्रालय गण्डकी प्रदेश, पर्वत अस्पताल र स्वास्थ्य कार्यालयको सहयोग रहेको छ । फागुन २१, २२ र २३ गते गरी तीन दिन सम्म सञ्चालन हुने शिविरको व्यवस्थापनको कार्य सम्पन्न भएको वडा अध्यक्ष रिमालले जानकारी दिनुभयो ।

शिविरका लागि निजामती कर्मचारी अस्पतालबाट विशेषज्ञ चिकित्सकसहितको झण्डै ५० जनाको मेडिकल टिम हिजो साँझ ठुलीपोखरी आइसकेको छ । शिविरको आइतवार बिहान ९ बजे उद्घाटन गर्ने कार्यक्रम रहेको छ । शिविरको पूर्व स्वास्थ्य मन्त्री तथा प्रतिनिधि सभाका सांसद पदम गिरीले उद्घाटन गर्ने कार्यक्रम रहेको छ । शिविरको सवैजसो संयोजक वडा अध्यक्ष रिमालले गर्नुभएको हो ।

शिविरमा प्रसुती तथा स्त्री रोग सेवा, हाडजोर्नी तथा नशा रोग, फिजिशियन सेवा, फेमिली मेडिशिन सेवा, यौन तथा चर्मरोग, फिजियोथेरापी, जेनेरल सर्जरी सेवा संचालन गरिने भएको छ । त्यसैगरी दन्त रोग, एक्सरे, भिडियो एक्सरे, इसिजी, बालरोग, रगत जाँच, मोनोरोग, नाक, कान घाँटी लगायतका समस्याको विशेषज्ञ डाक्टरहरुद्धारा उपचार गरिने निजामती कर्मचारी अस्पतालले जनाएको छ । शिविरमा सामान्य शल्यक्रिया गर्नुपर्ने भएमा तत्काल गरिने र थप उपचार गर्नुपर्ने भएमा सिभिल अस्पताल काठमाडौँमा रिफर गरि निशुल्क उपचार गर्ने व्यवस्था समेत मिलाइएको छ ।

आर्थिक अभावका कारण लामो समयदेखि विभिन्न रोग लुकाएर बसेका विपन्न नागरिकहरुको समस्यालाई मध्यनजर गर्दै शिविर संचालन गर्न थालिएको कुश्मा नगरपालिकाका नगरप्रमुख रामचन्द्र जोशीले जानकारी दिनुभएको छ । शिविरमा पर्वत जिल्लाका विभिन्न पालिकाका साथै छिमेकी जिल्ला स्याङ्जाका नागरिकहरुले समेत सेवा लिन सक्ने भएका छन् । शिविरमा उपचारका लागि आउने बिरामीहरुलाई आवश्यक धेरै औषधी पनि निशुल्क वितरण गरिने भएको छ ।

राजधानीका सुविधासम्पन्न निजामती कर्मचारी अस्पतालमा हुने सवैखालका रोगहरुको पहिचान, उपचार तथा सामान्य शल्यक्रिया सेवा समेत शिविरमा संचालन हुने भएकाले बढि भन्दा बढि नागरिकहरुले सहभागिता जनाएर स्वास्थ्य परिक्षण गराउन नगरप्रमुख जोशीले आग्रह गर्नुभएको छ ।

घर गाउँमै यति धेरै विशेषज्ञ सेवा सहितको उपचार सेवा नपाईने भएकाले पनि बालबालिका, युवा, युवती, गर्भवती, महिला, बृद्ध बृद्धाहरुलाई निःशुल्क उपचार सेवा लिन आग्रह गरिएको छ ।