पोखरा, ०२ चैत । पोखराको सेती खोँच नजिकै भ्वाङमा खसेकी बालिकाको मृत्यु भएको छ ।
माघ १ मा यतिको विमान दुर्घटना भएको ठाउँ नजिकैको खोचमा खसेकी पोखरा – ८ नागढुंगा बस्ने १२ वर्षीया स्मृति पराजुलीको मृत्यु भएको कास्की प्रहरीले जनाएको छ ।
जिल्ला प्रहरी कार्यालय कास्कीका प्रवक्ता डिएसपी श्रवणकुमार बिकका अनुसार पराजुलीलाई खोचमा खसेको झण्डै २ घण्टापछि उद्धार गरेर हस्पिटल पठाइएकोमा चिकित्सकले जाँच्ने क्रममा मृत घोषणा गरेका हुन् ।
शनिबार दिउँसो ३ बजेतिर पोखरा १५ स्थित सीताराम हाउजिङको चौरमा खेलिरहेकोमा स्मृति एक्कासी चौरको खाल्डो (दरार) बाट खसेकी थिइन् ।
दिउँसो ३ बजेतिर बच्चा खोँचमा खसेको जानकारी भएपछि प्रहरी टोलीले पराजुलीको अचेत अवस्थामा उद्धार गरेको थियो ।
