पोखरा, १३ जेठ । पोखरा महानगरपालिका वडा नम्बर १६ भित्र रहेका १४ वटा सामुदायिक विद्यालयका प्रतिनिधिलाई सरसफाइ तालिम प्रदान गरी डस्टविन वितरण गरिएको छ ।
विद्यालयका प्रधानाध्यापक र अध्यक्षहरूको उपस्थितमा सरसफाइ तालिम तथा प्रशिक्षण कार्यक्रम गरी कार्यक्रम पश्चात् कुहिने, नकुहिने र अन्य फोहोर राख्न विद्यालयलाई हरियो, रातो र निलो रंगको तीन/तीन वटा डस्टविन वितरण गरिएको आयोजक ग्रिन भ्याली बहुउद्देश्यीय सहकारी संस्था लिमिटेडका व्यवस्थापक गोविन्द आचार्यले जानकारी दिए ।
वडा नम्बर १६ को समन्वय एवं आर्थिक सहयोगमा भएको कार्यक्रममा स्रोतबाट नै फोहोर व्यवस्थापन गर्न प्रत्येक घर तथा शैक्षिक संस्थाबाट निस्कने फोहरको उचित विसर्जन गरी आम्दानीको स्रोत विकास गर्ने र फोहोरको उचित व्यवस्थापन गर्ने सम्बन्धमा तालिम प्रदान गरिएको आचार्यले बताए ।
शान्ति मावि जुम्लेटीमा भएको कार्यक्रममा सहकारीका अध्यक्ष प्रकाश आचार्यले शैक्षिक संस्था/टोल समुदायले फोहोर वर्गीकरण तथा व्यवस्थापनको दिगो समाधानका अभ्यास गर्न सके ल्याण्डफिल्ड साइट जाने फोहोर ९० प्रतिशत कम हुने भन्दै फोहोरलाई आम्दानी तथा रोजगारीको स्रोत बनाउन सकिने धारणा व्यक्त गरे ।
कार्यक्रम संयोजक तथा प्रमुख अतिथि वडा सदस्य राम चन्द्र आचार्यले सामुदायिक शैक्षिक संस्थाका पूर्वाधार विकासमा वडाको सधैँ सहयोग रहने भन्दै ग्रीन भ्याली रिसाइकल सहकारीको फोहोर व्यवस्थापन प्रयासमा साथ सहयोग र सहकार्य गर्न सधैँ तयार रहने प्रतिबद्धता जनाए।
कार्यक्रममा ज्ञान ज्योति माविका प्रधानाध्यापक श्री यम बहादुर कार्कीले फोहोर वर्गीकरण गरी विद्यालयले मोहर बनाउन ग्रीन भ्याली सँग सहकार्य गर्ने र सबैलाई गर्न अनुरोध गरे ।
चण्डीका आधारभूत विद्यालय व्यवस्थापन समितिका अध्यक्ष सन्दीप थापाले पोखरा १६ मा वर्गीकृत फोहोर(रिसाइकल) संकलन गर्ने ग्रीन भ्यालीलाई कुहिने र ल्याण्डफिल्ड साइट जाने न्यून फोहोरको ढुवानी जिम्मा दिन सके थप प्रभावकारी हुने भन्दै आवश्यक प्रबन्ध मिलाउन वडा समक्ष माग राखे ।
ग्रिन भ्याली बहुउद्देश्यीय सहकारी संस्था लिमिटेडले पोखरा १६ अर्मलामा Recyclable Waste(फोहोर) संकलन तथा प्रशोधन केन्द्र स्थापना गरी विगत दुई वर्षदेखि निरन्तर फोहोर व्यवस्थापन सम्बन्धी कार्य गर्दै आएको छ।
