पोखरामा महिलालाई मरणासन्न हुने गरि कुटपिट गरि झाडीमा फाल्ने एक युवकलाई प्रहरीले पक्राउ गरेको छ ।
जेठ २ गते राती १० बजेतिर पोखरा-१८ गुफाडाँडास्थित झाडीमा मरणासन्न अवस्थामा फेला परेकी महिलालाई कुटपिट गर्ने युवकलाई प्रहरीले पक्राउ गरेको हो । पक्राउ पर्नेमा धादिङ बेनीघाट रोराङ गा.पा.वडा नं.१० डुंगे घर भएका वर्ष २५ को दिपेन गुरुङ भन्ने सन्त बहादुर मगर रहेको प्रहरीले जनाएको छ ।
मगरले ती महिलालाई फलामको हथौडा तथा धारिलो हतियार चक्कु समेत प्रयोग गरी टाउकोको विभिन्न भाग, दायाँ आँखामा प्रहार गरी मरणासन्न अवस्थामा पुर्याई झाँडीमा फालेर उनको साथमा रहेको ४ हजार रुपैयाँ नगद र एक थान मोबाइल लुटेर भागेको प्रहरीले जनाएको छ । अभियुक्त मगरलाई नेपाल प्रहरी प्रदेश कार्यालय पोखरा, जिल्ला प्रहरी कार्यालय कास्की र वडा प्रहरी कार्यालय बैदामबाट खटिएको टोली उनकै घरबाट पक्राउ गरेको प्रहरी नायव उपरीक्षक श्रवण कुमार विकले जानकारी दिए ।
मगरलाई कास्की जिल्ला अदालतबाट कुटपिट वा अंगभंग सम्बन्धी कसुर मुद्दामा सात दिन म्याद थप गरी थप अनुसन्धान कार्य अगाडी बढाईएको प्रहरीले जनाएको छ ।
