भक्तपुर । भक्तपुरमा शनिबार साँझ कार दुर्घटना भएकाे छ । नगरकोटबाट सुडालको कलमसी हुँदै भक्तपुरतर्फ फर्कंदै गरेको बा१८च २५११ नंको निजी कारको ‘ब्रेक फेल’ भई दुर्घटना भएकाे प्रहरीले जनाएकाे छ ।
चाँगुनारायण नगरपालिका-८ सुडाल हनुमान चोकमा अनियन्त्रित भएपछि सडकबाट अन्दाजी ५० मिटर तल खसेर दर्घटना भएको प्रहरी प्रभाग सुडालले जनाएको छ ।
झापा दमक नगरपालिका-१० घर भएकी निशा श्रेष्ठका नाममा रहेको उक्त कारमा सवार तीन महिला, दुई पुरुष र दुई बालक घाइते भएका र उनीहरूकाे मध्यपुर अस्पतालमा उपचार भइरहेकाे प्रहरीले जानकारी दिएको छ ।
प्रहरीका अनुसार घाइतेको नाम र ठेगाना अझै आउन बाँकी रहेको जिल्ला प्रहरी परीसर भक्तपुरका प्रहरी नायव उपरीक्षक मोहनमाणि अधिकारीले जानकारी दिए ।
