गण्डकी खबर । गण्डकी प्रदेशमा नेकपा माओवादी केन्द्रको तर्फबाट थप तीन जना मन्त्रीको टुङ्गो लागेको छ।
नेपाली काँग्रेस र माओवादी केन्द्रको बिहीबारको संयुक्त बैठकपछि तिन मन्त्रालय सम्हाल्ने गरी
माओवादी केन्द्रको तर्फबाट सरकारमा जाने सांसदको टुङ्गो लागेको सांसद दीपक कोइरालाले जानकारी दिनुभयो ।
सांसद कोइरालाका अनुसार रामजी बरालले अर्थ, चन्द्रबहादुर बुढाले कृषि र दीपक चर्तीले वन तथा वातावरणमा मन्त्रालयको जिम्मेवारी सम्हाल्ने भएका छन् ।
थप तीनैजना मन्त्रीको शपथ कार्यक्रम शुक्रबार दिउँसो १ बजेका लागि तय भएको छ ।
माओवादी केन्द्रको तर्फबाट सरकारमा यसअघि नै सांसद मधुमाया अधिकारी स्वास्थ्य तथा जनसंख्या मन्त्री हुनुभएको छ ।
सरकारको नेतृत्व गरिरहेको नेपाली काँग्रेसले भौतिक पूर्वाधार सहित सामाजिक, पर्यटन र प्रदेश मामिला मन्त्रालय पाएको भएपनि मन्त्रीको नाम अझै टुंग्याएको छैन ।
कुमार खड्का भने यसअघि नै सामाजिक विकास मन्त्री बन्नुभएको हो ।
प्रदेशमा यस अघि नै जनता समाजवादी पार्टीका सांसद हरिशरण आचार्य उर्जा, जलश्रोत तथा खानेपानी
मन्त्री तथा स्वतन्त्र सांसद राजीव गुरुङ युवा तथा खेलकुद मन्त्री बनिसक्नुभएको छ ।