पोखरा १३ मा रहेको संगम क्लबको आयोजनामा सोमबार देखि आठौँ संस्करणको संगम कप विल स्मृति फुटबल प्रतियोगिता २०७९ हुने भएको छ । फुटवल खेलको विकास गर्ने उद्धेश्यले यही फागुन ८ देखि १३ गतेसम्म पोखरा रंगशालामा हुने उक्त प्रतियोगिताको सम्पूर्ण तयारी पूरा भएको क्लबले जनाएको छ ।
सोमबार पहिलो खेल आयोजक संगम क्लव र सत्य युवा क्लव बी १३ बीच हुने भएको प्रतियोगिताका संयोजक शिव गुरुङ (माया) ले बताए । त्यसै गरी सोमबार नै सितल ज्योति क्लव र एल.जी.एशोसीयसनबीच दोश्रो खेल हुनेछ ।
प्रतियोगितामा १६ टिमको सहभागिता रहेको संयोजक मायाले बताए । अखिल नेपाल फुटवल संघ (एन्फा) कास्कीमा आबद्ध भएका क्लबहरुबीच मात्र प्रतिस्पर्धा हुने प्रतियोगिताबाट कास्कीको टिम तयार पार्न २५ जना खेलाडीहरु छनौट समेत गरिने भएको उनले बताए ।
प्रतियोगिताका विजेतालाई १ लाख ७५ हजार, उपविजेतालाई १ लाख साथमा ट्रफी, मेडल र प्रमाण पत्र वितरण गरिने भएको क्लबका अध्यक्ष नरेन्द्रजंग गुरुङले बताए । तल्लो स्तरबाटै फुटबल खेलको विकास गर्ने उद्धेश्यले उक्त प्रतियोगितालाई निरन्तर रुपमा आयोजना गर्दै आएको उनले जनाए । प्रतियोगिताको मुख्य प्रायोजकको रुपमा सहारा हङकङ र संगम एल.जी.हङकङ रहेको छ ।
प्रतियोगितामा उत्कृष्ट हुने खेलाडीलाई ७ हजार, प्रतियोगितामा उत्कृष्ट स्टाइकर, उत्कृष्ट डिफेन्स र उत्कृष्ट मिडफिल्डरलाई जनहि ५-५ हजार पुरस्कार प्रदान गरिने भएको छ । आयोजक संगम क्लबले २०६८ मा जिल्लामा छनौट भई राष्ट्रिय लिग समेत खेलेको थियो ।
क्वाटरफाइनलबाट हरेक खेलमा म्यान अफ दी म्याचलाई ट्रफीको साथमा एक हजार रुपैया समेत प्रदान गरिने भएको छ । पुर्व खेलाडी संगम क्बलका संस्थापक सदस्य एवं कप्तान समेत रहेका बिल तामाङको स्मृतिमा क्लवले उक्त फुटबल प्रतियोगिता संचालन गरेको हो ।
यसैबीच, सोमबार उक्त प्रतियोगिताको एक समारोहसहित दिउँसो १ः०० बजे कास्की जिल्ला फुटबल संघ (एन्फा) का अध्यक्ष उज्जल रन्जितबाट उद्घाटन हुने कार्यक्रम तय गरिएको क्लबले जनाएको छ ।
