पोखरामा इलेक्ट्रिक स्कुटर सेगवेको शोरुम सञ्चालनमा आएको छ । शनिबार पोखराको पुरानो विमानस्थल नजिकै खोलिएको नयाँ शोरुमलाई आईहव प्रा.लिका निर्देशक लोकेश वली र पोखरा उद्योग बाणिज्य संघका अध्यक्ष पवन प्रजापतिले रिबन काटेर संयुक्त रुपमा उद्घाटन गरेका थिए । शोरुमलाई पोखराका व्यवसायी प्रदीप पहारीले संचालनमा ल्याएका हुन् ।
नयाँ शोरुमले यस क्षेत्रका ग्राहकहरुलाई सेगवेको नयाँ उत्पादनहरु अनुभव गर्ने अवसर प्रदान गर्ने विश्वास गरिएको छ । पोखराको वातावरणलाई सुहाउँदो ईलेक्ट्रिक स्कुटरहरु सेगवेमा उपलब्ध हुने आईहव प्रालिका निर्देशक लोकेश वलीले जानकारी गराए । उनका अनुसार सेगवे अमेरिकन कम्पनी र चाइनिज कम्पनी मिलेर बनेको कम्पनी हो । ‘सेगवे नेपालमा आएको एक वर्ष पुगिसक्यो । काठमाडौंमा यसले राम्रो मार्केट लिएको छ । पोखरामा पनि सफलता मिल्नेमा आशावादी छौं ।’, उनले भने ।
२ लाख ६० हजार, २ लाख ९१ हजार, ३ लाख ६० हजार र ३ लाख ९१ हजार रुपैयाँ मूल्यको स्कुटर अहिले सेगवेमा उपलब्ध रहेको जानकारी उनले गराए । वलीले इलेक्ट्रिक स्कुटरमा किनिसकेपछि खासै खर्च नहुने बताए । उनका अनुसार इलेक्ट्रिक स्कुटर एकपटक चार्ज गरिसकेपछि त्यसले ७५ किमी सम्म माइलेज दिन्छ । पोखराका ग्राहकहरुलाई सेगवेको उत्पादन मन पर्नेमा उनी विश्वस्त देखिन्छन् ।
बिक्रीको अतिरिक्त, पोखराको सेगवे शोरुमले ग्राहकहरूलाई उत्कृष्ट सेवाको साथमा स्पेयर पार्ट्स पनि उपलब्ध गराउने संचालक प्रदीप पहारी बताउँछन् । ‘शोरुममा प्रशिक्षित प्राविधिक टोली रहनेछन् जसले कुनै पनि सेगवे स्कुटरको लागि छिटो र प्रभावकारी सेवा प्रदान गर्नेछन् ।’, उनले भने ।
शोरुममा सेगवेका लोकप्रिय ईलेक्ट्रिक स्कुटरहरु, व्यक्तिगत ट्रान्सपोर्टरहरु र अन्य मोबिलिटी सोलुसनहरु रहेको उनले बताए । ग्राहकहरुलाई उत्पादनहरु परीक्षण गर्ने र जानकार कर्मचारीहरुबाट विशेष मार्गदर्शन प्राप्त गर्ने मौका प्रदान गर्ने गरी पोखरामा संचालनमा ल्याइएको उनको भनाई थियो ।
नयाँ शोरुम पोखराको पुरानो एयरपोर्टमा रहेको जानकारी गराउँदै उनले नयाँ शोरुममा धेरै सुविधाहरु हुनुका साथै हालसालै सार्वजनिक भएका सेगवेका स्कुटर र बाइकहरु रहेको जानकारी गराए । उनका अनुसार सेगवेको पोखरा शोरुम करिब एक करोड लागतमा संचालनमा आएको हो ।
नेपाली बजारमा पहिले नै उपलब्ध सेगवे ई–श्रृङ्खला अन्तर्गतका ई–१००, ई–१२५, ई–११०, ले ग्राहकको पशंसा बटुल्नुका साथै आफ्ना सुविधाहरु र सजिलो ह्यान्डलिङका लागि प्रसिद्व छन् । भर्खरै सेगवले नेपालमा एन श्रृङ्खला अन्तर्गतको एन १०० सार्वजनिक गरेको छ ।
