पोखरा, २ जेठ । गण्डकी प्रज्ञा प्रतिष्ठानका कुलपति सूर्य खड्का बिखर्चीले विद्यालय शिक्षामा संस्कृत हटाउनु दुर्भाग्य भएको बताएका छन् ।
अनुसन्धान व्यवस्थापन एकाइ, विन्दुवासिनी संस्कृत विद्यापीठ, पोखराको आयोजनामा आजदेखि सुरु भएको क्षमता विकास तालिम उद्घाटन गर्दै कुलपति बिखर्चीले यस्तो बताएका हुन् ।
‘विद्यालय शिक्षामा संस्कृत हटाउनु दुर्भाग्य हो, हाम्रो सभ्यता र संस्कृतिको मौलिकता जोगाउन संस्कृतको पठनपाठनलाई तल्लो तहसम्मै पु¥याउनु जरुरी छ,’ कुलपति बिखर्चीले भने ।
बाहिरी संसारले उच्च महत्त्व दिएर माया गरेको संस्कृत विषयलाई नेपालको विद्यालय शिक्षाबाटै हटाइनु दुखद रहेको उनको भनाई छ ।
नेपाल संस्कृत विश्विद्यालय प्राध्यापक संघ, केन्द्रीय समितिका उपसभापति सहप्राध्यापक आनन्दमणि रिजालले विश्वविद्यालयले सबै प्राध्यापकहरूलाई प्राज्ञिक अध्ययन र अनुसन्धानका निश्चित कार्य गर्नै पर्ने व्यवस्था गर्नुपर्ने धारणा राखे ।
विद्यापीठका प्राचार्य डा. जगन्नाथ रेग्मीले विद्यापीठलाई अनुसन्धान एवम् प्राज्ञिक क्षेत्रमा गतिशील बनाउन सबैको साथ र सहयोग आवश्यक भएको बताए ।
विद्यापीठका संस्थापक प्राचार्य सह प्राध्यापक श्रीराम बरालले तालिमका उपलब्धिलाई व्यवहारमा उतार्नु जरुरी रहेको बताए ।
विद्यापीठका प्राचार्य डा.जगन्नाथ रेग्मीको सभापतित्वमा सम्पन्न उद्घाटन समारोहमा अनुसन्धान व्यवस्थापन एकाइका संयोजक सह प्राध्यापक डा. चूडामणि कँडेलले स्वागत गरेका थिए ।
सहप्राध्यापक सत्यराज सुवेदीको अध्यक्षतामा सम्पन्न कार्यपत्र प्रस्तुतीका दुई सत्र अन्तर्गत पहिलो सत्रमा पृथ्वीनारायण क्याम्पसको अंग्रेजी विभागका उपप्राध्यापक डा.सवीन्द्रराज भण्डारीले प्रोस्पेक्ट्स एण्ड च्यालेन्ज्स अफ टिचिङ कम्पलसरी इङ्गलिस इन शास्त्री फस्ट एण्ड सेकेन्ड इयर विषयक कार्यपत्र प्रस्तुत गरेका थिए ।
उक्त कार्यपत्र माथि पोखरा विश्वविद्यालयका उपप्राध्यापक भरत ढकालले टिप्पणी गरेका थिए भने प्राध्यापकहरू श्यामप्रसाद पौडेल, अम्बिकाप्रसाद भट्टराई, योगराज पौडेल, विष्णुप्रसाद शर्मा, प्रकाश पौडेलले विभिन्न जिज्ञासा र सुझाव व्यक्त गरेका थिए ।
दोस्रो सत्रमा सिद्धान्त ज्योतिषका सह प्राध्यापक पूर्णचन्द्र वाग्लेले “प्रथम लग्नानयनमा देखिएका समस्या र निराकरणका उपायहरू” शीर्षकको अवधारणापत्र प्रस्तुत गरेका थिए ।
उक्त अवधारणापत्रमा सह प्राध्यापक श्रीराम बरालले टिप्पणी एवम् प्राध्यापकहरू पशुपति दवाडी, नारायणप्रसाद सापकोटा, योगराज पौडेल, जगन्नाथ रेग्मी, सवीन्द्रराज भण्डारी, भानुभक्त आचार्यले विभिन्न जिज्ञासा र सुझाव व्यक्त गरेका थिए ।
कार्यक्रमको सञ्चालन उपप्राध्यापक प्रकाश पौडेलले गरेका थिए ।
