नेपाल राष्ट्र बैंकले देशको वर्तमान आर्थिक तथा वित्तीय स्थितिबारे शुक्रबार जारी गरेको विवरणअनुसार गत वर्षको यस्तै अवधिको तुलनामा रेमिटेन्स २३.४ प्रतिशतले वृद्धि भएको छ ।
पछिल्लो विवरण अनुसार आर्थिक वर्ष २०७९/८० को १० महिनामा १० खर्ब ५ अर्ब १८ करोड रुपैयाँ बराबर रेमिट्यान्स भित्रिएको छ । यो भनेको प्रतिमहिना औसत एक खर्ब रेमिट्यान्स हो । रेमिटेन्स सँगसँगै वैदेशिक रोजगारीका लागि अन्तिम श्रम स्वीकृति लिने नेपालीको संख्या पनि ५१.४ प्रतिशतले बढेको छ । यस अवधिमा ४ लाख २१ हजार २ सय ७९ जना श्रमिक नयाँ श्रम स्वीकृति लिएर विदेश गएका छन् ।
यसैगरी राष्ट्र बैंकका अनुसार विदेशी विनिमय सञ्चितिमा पनि २०.९ प्रतिशतले वृद्धि भएको छ । उक्त सञ्चिति ११.२ महिनाको वस्तु आयात र ९.७ महिनाको वस्तु तथा सेवा आयात धान्न पर्याप्त रहनेछ । २०७९ असार मसान्तमा ९ अर्ब ५४ करोड डलर सञ्चिति रहेकोमा २०८० वैशाख मसान्तमा १७.६ प्रतिशतले वृद्धि भई ११ अर्ब २१ करोड डलर कायम भएको छ ।
