सुनको भाउमा पछिल्ला तीन दिनमै दुई हजार रुपैयाँले गिरावट आएको छ । हिजो मात्रै ५ सयले घटेको सुनको मूल्य आज थप ७ सय रुपैयाँले घटेको हो ।
नेपाल सुनचाँदी व्यवसायी महासंघले शुक्रबार सुनको मूल्य तोलामा ७ सय रुपैयाँले घटेको जनाएको छ । यससँगै छापावाल सुनको मूल्य तोलामा १ लाख ९ हजार ८ सय र तेजाबी सुनको मूल्य तोलामा १ लाख ९ हजार ३ सय रुपैयाँ तय भएको जनाएको छ । बिहीबार छापावाल सुनको मूल्य तोलामा १ लाख १० हजार ५ सय र तेजाबी सुनको मूल्य तोलामा १ लाख १० हजार रुपैयाँ कायम थियो ।
यस्तै, शुक्रबार चाँदीको मूल्यमा प्रतितोला २५ रुपैयाँको गिरावट आएको छ । महासंघले चाँदीको मूल्य घटेसँगै आज प्रतितोला १३ सय ३५ रुपैयाँमा कारोबार भइरहेको जनाएको छ । बिहीबार चाँदीको मूल्य तोलामा १३ सय ६० रुपैयाँ कायम थियो ।
