गण्डकी खबर। पोखराका केही उपभोक्ताले पानीको धारामा जडान गरेको मिटर झिकेर पानी चोरी गर्ने गरेको पाइएपछि खानेपानी संस्थानले त्यस्ता उपभोक्तालाई कारवाही अगाडि वढाउने भएको छ ।
खानेपानी संस्थानले जडान गरेको मिटर झिकेर विद्युतीय पम्पको माध्यमबाट चोरी गर्नेको संख्या बढेको संस्थानले दावी गरेको छ । मंगलबार पोखरा १७ माथिल्लो बेलघारीमा संस्थानको अनुगमन टोलीले ५ उपभोक्ताको घरबाट पम्प जफत गरेको संस्थानका कर्मचारी लक्ष्मण पाण्डेले बताउनुभयो ।
पोखरा–१७ का केही उपभोक्ता छिमेकीले पम्प लगाइदिएपछि आफ्नो धारामा पानी नझरेपछि गुनासो लिएर संस्थानमा पुगेपछि मात्र संस्थानले अनुगमन थालेको हो । खानेपानी संस्थानले पोखरालाई प्रर्याप्त मात्रामा पुग्ने पानी मर्दीखोलाबाट २० इन्चको पाइपलाईनमा ल्याएर पोखराको बिन्ध्यवासिनी स्थित मूल टंकीमा खसालेको भएपनि नगर क्षेत्रमा पाइपलाई विस्तार नहुँदा पानी नालीमा बगाउनुपर्ने अवस्था छ ।
जडान गरेको मिटर फालिदिने र पानीको न्यूनतम शुल्क तिर्ने उपभोक्ता पोखरामा वर्षेनी बढेको खानेपानी संस्थानको जनाएको छ । खानेपानीको मिटर झिकेर मोटरको माध्यमबाट पानी तान्नु अपराध भएपनि उपभोक्ता सजग नहुँदा समस्या परेको कार्यालय प्रमुख इन्जिनियर आशिष कार्की बताउँनुहुन्छ । कानुन विपरीत काम नगर्न उपभोक्तालाई आग्रह गरेका छौ, अव अनुगमन टोली खटाएर पानी चोरीगर्नेलाई नियन्त्रणमा लिने कार्की बताउनुहुन्छ । पोखरामा वितरीत ४५ हजार धारा वितरण गरेका छौ, पानी चोरीको प्रकृति हेरी संस्थानले कारवाही अगाडि वढाउँछ, प्रमुख कार्कीले भन्नुभयो ।
चुहावट नियन्त्रण गर्न गठित अनुगमन टोलीले पोखरा–१७ को छोरेपाटन, बेलघारी, बिरौटा, हिमाली टोल, चाउथे र विन्ध्यवासिनी क्षेत्र अन्तर्गत सिम्पानी, अधिकारी टोल, हमाली टोल, नदीपुर लगायत क्षेत्रमा नियमित अनुगमन गरिने कार्यालयले जनाएको छ । संस्थानले पोखराको विभिन्न क्षेत्रमा अनुगमनलाई तिव्रता दिई उपभोक्ता हितमा लाग्ने योजना बनाएको कार्यालय प्रमुख कार्कीले बताउनुभयो ।
उपभोक्ताको गुनासोलाई ध्यान दिँदै नेपाल खानेपानी संस्थान पोखरा शाखाले कार्यालय समय अतिरिक्तसमेत अनुगमन गर्ने जनाएको छ । यता उपभोक्तालाई स्वच्छ पिउने पानी वितरण गर्ने जापानिज सहयोग संस्था जाइकाले शुरु गरेको मर्दी मुहान ट्रिटमेन्ट प्लन्ट अन्तर्गत ३० प्रतिशत काम सम्पन्न भएको कार्यालय प्रमुख कार्कीले जानकारी दिनुभयो ।
