पोखरा, ३ जेठ । यातायात व्यवस्था कार्यालय पोखरामा बुधबार गण्डकी प्रदेशका भौतिक पूर्वाधार विकास तथा यातायात व्यवस्था मन्त्री रेशमबहादुर जुग्जालीले छड्के अनुगमन गरेका छन् ।
यातायात कार्यालयबाट प्रवाह हुने सेवाको अवस्था र सेवाग्राहीको समस्या पहिचान गर्न मन्त्री जुग्जाली आकस्मिक रूपमा अनुगमनमा पुगेका हुन् । मन्त्री जुग्जालीले यातायात व्यवस्थापन कार्यालयको सवारीचालक अनुमतिपत्र अनुगमनका क्रममा सेवाग्राहीले उठाएका समस्यालाई पहिलो प्राथमिकतामा राखेर यातायात क्षेत्रको सुधारको काम सुरुवात गरिने बताए ।
सेवाग्राहीहरूले मन्त्रीसँग कार्यालयमा खाने र शौचालयमा प्रयोग गर्ने समस्या भएको, सेवा प्रवाह अव्यवस्थित, आफ्नै साधनले पनि ट्रायल दिनका लागि समस्या, ट्रायल सेन्टरमा निजी कम्पनीको हालीमुहाली, पुराना मोटरसाइकल तथा स्कुटरबाट ट्रायल दिनुपर्ने बाध्यता रहेको गुनासो गरेका थिए ।
“जनताले कस्तो सेवा पाइरहेका छन् भनेर आफूले अनुगमनमा आएको हो,” उनले भने “जनताको सेवा बुझौँ भनेर छड्के अनुगमन गरेको हुँ । अनुगमन गर्दा सेवाग्राहीका धेरै समस्या आएका छन् । समाधानका लागि मन्त्रालयबाट आजैदेखि सहजीकरणको प्रक्रिया थालनी गर्छौँ ।”
मन्त्रालयका उपसचिव तथा यातायात व्यवस्थापन महाशाखाका प्रमुख टिकाराम पौडेलसहित मन्त्री कार्यालय अनुगमनमा पुगेका हुन् । गत शुक्रबार मन्त्रालयको जिम्मेवारी सम्हालेका मन्त्री जुग्जालीले भौतिक पूर्वाधारका साथै मन्त्रालय मातहतका यातायात कार्यालयबाट प्रवाह हुने सेवालाई सुधारमा चासो दिएका छन् ।
मन्त्री जुग्जालीले पोखरामा सञ्चालन हुने सवारी साधनको प्रदूषण परीक्षण र मापदण्डको कार्यान्वयनका विषयमा मंगलबार मन्त्रालयमा सचिव र सम्बन्धित महाशाखाका प्रमुखहरूसँग छलफल गरेका थिए । छलफलका क्रममा २०७६ भदौदेखि कास्कीमा सुरु भएको गाडीको प्रदूषण परीक्षण सम्बन्धी मापदण्ड कार्यान्वयन नभएको पाइएको छ ।
यातायात व्यवस्था कार्यालयसँग मेसिन भए पनि हालसम्म अनिवार्य परीक्षण नभएको र अन्य यान्त्रिक परीक्षण गरिए पनि प्रदूषण जाँच भने नगरेको मन्त्रीसँगको छलफलमा कर्मचारीहरूले बताएका थिए । उनीहरूले कार्यालयमा ठाउँ अभाव भएका कारण पनि सबै गाडीको परीक्षण गर्न समस्या रहेको ब्रिफिङ गरेका थिए ।